【孖陳展鵬合體宣傳《同盟》】胡定欣:放低咗幾個月!

今日定欣同陳展鵬喺將軍澳合體宣傳《同盟》,二人喺台上鮮有交流,冇乜眼神接觸,比起上次宣傳《城寨》,完全係天同地。。。

之前一直有傳陳展鵬同胡定欣因為合作拍《城寨英雄》同《同盟》而撻著,嗰陣佢哋人前人後都表現好sweet,大家仲為佢哋係一對,點知今年3月俾周刊踢爆陳展鵬同落選港姐單文柔摸黑上山頂開餐談心,被指背住定欣偷食嘅陳展鵬,事後聲稱自己單身未婚,同胡定欣絕對唔係拍拖,亦都冇撻著過。仲轉晒口風話同單文柔目前係了解中,唔排除有機會發展。定欣之後亦都話成件事同佢無關,大家一直只係同事關係。

 

今日定欣同陳展鵬喺將軍澳合體宣傳《同盟》,不過佢哋中間夾住鮑姐,喺台上鮮有交流,仲冇乜眼神接觸,比起上次宣傳《城寨》,完全係天同地。

 

現場播咗一段預告片段,內容大約係講定欣用長腿引誘陳展鵬,點知陳展鵬喺唔耐煩嘅情況下,同定欣大打出手,情況同打MMA一樣,搞到現場觀眾個個睇到嘩嘩聲!

 

司儀吳家樂都話佢哋好似玩MMA,定欣話:「其實都擺低咗好長時間,第一次睇番!」陳展鵬就話:「嗰啲動作即興,練係第二啲更加勁,o依家睇住少少先,呢度只係1/3嚟!」吳家樂即刻食住上,話既然「即興」,問大家夠唔夠「興」?

 

定欣聞言就話:「要排幾個月先練到,放低咗幾個月!」陳展鵬亦話:「今日好多小朋友,唔好亂嚟,因為呢啲係經過特別訓練,如果o依家現場做,失手影響就唔好,不過都適合小朋友去睇。」

 

點知吳家樂一於懶理,叫佢哋擺1、2個動作pose俾大家影吓相,陳展鵬就問定欣:「你想點呀?你想點我咪想點!」不過定欣冇答佢,只係擺咗一個揸拳嘅pose!不過吳家樂就話起碼有啲埋牙少少嘅動作pose,結果搵咗郭師傅上台,擺咗個定欣制服陳展鵬嘅pose!

 

之後又播咗喺第二條預告片又見到陳展鵬露半股,陳展鵬呢個係佢歷史上第一次露半股,佢又冇錯喎,喺N年之前,陳展鵬喺亞視拍旅遊特輯,淨係露股罅全裸浸溫泉啫!

(蘋果日報)

留言