【本來預產期係下個星期】胎位低改開刀生B

醫生指佢胎位低,為咗安全建議佢改為剖腹生B,突然通知要開刀。。。

肚大如籮嘅黃婉曼,本來預產期係下個星期,一直係打算自然分娩,感受下生BB嘅感覺。點知黃婉曼近日去產檢時,醫生指佢胎位低,為咗安全建議佢改為剖腹生B,突然通知要開刀,令佢心理壓力更大,好彩有老公馮柏基不停安撫,仲會陪老婆入產房。

 

黃婉曼早前發現有妊娠糖尿,每日餐後都要篤手指驗血,又聽醫生吩咐注意飲食同戒口。為咗紀念生第一胎,黃婉曼日前挺住巨肚,安排攝影師返家拍攝大肚寫真,佢今日接受《蘋果》電話訪問時話:「我參考過好多人哋大肚寫真,我就想帶出一個家嘅感覺,所以成輯相都喺係屋企,或周邊範圍影,希望將來囡囡大個咗,睇到輯相有甜蜜感覺,始終就孕育咗生命出嚟。」

 

大肚婆晒巨肚係理所當然,可是黃婉曼就話影時好怕醜:「我游水都唔會着三點式,仲要我揭開個肚皮畀人睇,我開頭都覺有啲尷尬,但攝影師話巨肚係焦點,我惟有都影一張留念啦。」陀女嘅黃婉曼,肚皮圓圓,捧着巨肚拍照,一臉期待。

 

對於可以提早「卸貨」,黃腕曼話:「都有啲唔捨得,或者因為習慣咗囡囡喺肚中,唔知佢出咗嚟係乜嘢樣。但我個肚呢幾個月大咗好多,腰好痠,大髀企得耐壓住神經線有啲痛。醫生通知我胎位低,為安全要開刀生,好似未有時間做多啲心理準備咁,我會諗到時入產房會點,會有啲怯,我又驚老公都驚,不過,好多過來人教我,到時捉實老公隻手,驚就兩份。」問黃婉曼可擔心囡囡出世,老公會唔會偏心?佢話:「一定會,我預咗失寵,相信到時全家焦點都喺BB度。」黃婉曼產前都未停工,日前仲返麵包學校監察試造月餅過程。

(蘋果日報)

留言