【53歲譚玉瑛回應「婚訊」】大家搞錯哂﹗

日前有報導指譚玉瑛姐姐已經秘密結婚十幾年。。。

譚玉瑛、陸詩韻、漢陽同譚嘉荃今日去到旺角出席一間醫學中心開幕,講起保健心得,譚玉瑛姐姐話:「最好keep住日日飲酒,紅酒白酒都冇所謂,而且唔好揀飲擇食同埋做適量運動。」

 

講到有報道話佢已經秘密結婚十幾年,譚玉瑛姐姐話:「我冇留意報道,其實係唔正確嘅,o依家仲邊度興收埋唔講㗎?今時今日結婚拍拖生仔都要話畀人聽,仲收埋收埋咩?如果有,我一定同大家講。」

 

有報道話蓋世寶同無綫得返半年合約,唔知道日後何去何從,譚玉瑛姐姐話:「我又唔知道佢得番幾耐合約,我哋有個群組有時都會傾吓偈,大家都會講吓第時唔做呢份工會做啲咩,工唔會打一世,只不過冇傾得咁深入,唔知道佢有咩計劃。」

 

同場嘅陸詩韻就見佢膊頭有幾度瘀痕,佢話:「係之前喺公司執files嘅時候撞瘀咗,自己血氣唔好,所以之前都睇過針灸師調理。」咁搵個男朋友呵番? 佢話:「呢排搵針灸師呵!我得啦。」

(蘋果日報)

留言