【父患腦退化失蹤6日】黃又南:擔心爸爸有一日連仔女都唔記得

黃又南入行16年,一直孭住家庭重擔,曾代還債幾百萬,當時又南日夜返工,試過體力透支,喺首映禮暈咗。。。

如果要數圈中孝順仔,黃又南都算係幾好仔,入行16年,一直孭住家庭重擔,早年爸爸生意失敗,欠債7百萬,黃父又一度沉迷賭博,當時仲係Shine成員嘅又南代父還債,日夜返工,試過體力透支,喺首映禮暈咗,而且Shine喺圈中發展初時紅過,後嚟因為唱片公司嘅問題,令佢咃未能發展未如理想,又南就捱得更辛苦,決定外闖北上拍戲,好在喺大陸有市場,總算喺電影圈有立足之地。好景不常,又南最近又為家事擔心!

 

今日有周刊指,黃父患腦退化,今年7月中更喺將軍澳失蹤,趁老婆外出時,離開日出康城寓所,隔咗第6日,警方查黃父嘅八達通記錄,最終喺紅磡搵到黃父,事後又南已立即請專人照顧爸爸,之前又訂咗GPS,不過未到手,就發生失蹤事件,又南喺報道就話只係想爸爸身體健康,最擔心黃父有一日連仔女都唔記得,報道講番又南喺2012年個唱,曾講過還錢日子嘅辛酸,有問過圈中人陳曉東同樊少皇借錢,又試過叫朋友請食杯麵,近年終於還晒所有錢,又南自言冇怪過爸爸,亦唔覺得爸爸係負累,出年3月,又南同天佑就喺紅館開Shine個唱。

(蘋果日報)

留言