郭穎兒(Celia K.)舊年嫁畀圈外男友李冠鋒,今年3月生咗囡囡李明芯(Galia),話咁快囡囡已100日大,兩公婆噚日訂咗酒店搞百日宴,唔計小主角芯芯,特登招呼咗100位賓客,李蘊仲帶埋囡囡羅紫晞出席,仲有C AllStar嘅梁釗峰都係座上客。

 

Celia將芯芯打扮成pink baby,頭飾係由姨媽親手DIY,芯芯日前感冒,仲交叉感染惹埋爹哋媽咪,好彩一家三口趕及噚日好番晒,芯芯狀態唔錯,Celia今日周刊時話:「芯芯雖然仲有少少流鼻水,但好合作,任抱任影,完全冇扭計,四小時派對,佢尾聲先眼瞓。」

Celia為咗囡囡畀嘅百日宴,佢前日花咗9粒鐘去整咗立體旋轉木馬蛋糕,果然世上只有媽媽好,佢話:「囡囡o依家淨係可以飲奶,冇份食蛋糕,但將來佢睇番相,一樣好開心,蛋糕我哋大人食。」Celia產後餵咗一個月母乳就停咗,芯芯o依家三個幾月,戒埋夜奶,所以輕鬆啲,佢話打算等芯芯半歲,抵抗力好啲,一家三口就出埠旅行。

(蘋果日報)

留言