洗米嫂陳慧玲(Heidi)今日弗爆現身中環,為投資七位數的健身中心進行揭幕儀式。穿上綠色吊帶裙配襯金色高跟鞋的Heidi一早到場招待,到來嘉賓有樂易玲、王君馨夫婦、黃長興、陳展鵬及As One前成員Shin。

為了等埋仔仔周柏豪一齊剪綵,Heidi將剪綵儀式押後少少開始,當見到手執自家品牌logo紙袋嘅柏豪出現合照時,Heidi笑住叫柏豪放低手袋(意指紙袋),但柏豪遲疑,Heidi事後再笑佢:「你唔著埋件(公司logo)Tee嚟?」

洗米嫂平時熱愛做Gym,依家仲當埋係一盤生意,佢話:「點解會揀香港?香港市場大啲,澳門人做gym比較鍾意自己做,香港多啲人揀私人教練。」

間舖今日開張,Heidi已經諗定開連鎖店,物色緊地段。老公洗米華可有到來參觀?柏豪搶答:「周生啱啱嚟咗。」那洗米華有冇俾意見?Heidi話:「我生意咁多,俾唔到咁多意見。」忙完新店揭幕,今個月將會是每年一度家庭旅行,Heidi透露今次會去耐少少,主要係去歐洲玩,再陪大女去英國開學。Heidi自然不捨女兒:「好早之前已經唔捨得,始終女仔唔想佢咁早過去,係哥哥叫佢過去,佢亦有好多朋友同學過咗去。」

(蘋果日報)

留言