【賽前次熱結果排第6】獲大台藝訓班取錄照say no

同屆陳凱琳、蔡思貝、劉佩玥、朱智賢…個個都發展得唔錯。。。

張敬仁係2013年度港姐參選佳麗,同屆嘅仲有陳凱琳、蔡思貝、劉佩玥、朱智賢、歐陽巧瑩、劉溫馨、林伊麗、李曉東等,當年入圍決賽嘅張敬仁,獲觀眾透過TVB Fun投以35,808票,成為最高票數佳麗第3位,亦被視為賽前大熱。可惜決賽當晚只排第6,無緣獲得任何主要獎項。

 

有指曾獲「2013年全美華埠小姐第三公主」嘅張敬仁,當年獲大台藝訓班取錄,但佢就選擇以自由身身份發展其演藝事業,係同屆唯一一位冇加入大台嘅決賽佳麗。

 

咁入咗嗰班又點呢?相信大家都知道少少。

 

以冠軍陳凱琳為例,攞完港姐后冠後,翌年代表香港參與華姐再以大熱姿態奪冠,其後拍過《名門暗戰》、《四個女仔三個Bar》、《張保仔》、《殭》等劇集,戲份都唔輕。感情生活方面,佢同《殭》男主角鄭嘉穎戲假情真,發展「父女戀」,但陳凱琳無視外界評論,愛得甜蜜。

 

亞軍蔡思貝呢,緋聞多到數唔晒,最多係被指同人撞樣,包括靠打機上位嘅網絡紅人達哥(林慧韡),代表作……都有嘅,最近嗰套《踩過界》,蔡思貝「犧牲色相」扮哨牙師爺,幫住「盲俠」王浩信,好過佢以前喺《衝線》嗰啲「高分貝」演技好多……

 

同屆季軍劉佩玥啲緋聞都不遑多讓,先後獲賭王何鴻燊四房公子猷亨做外賣仔送消夜,又傳同伍允龍合演《城寨英雄》撻着,近期較激嘅係佢舊年喺《幕後玩家》中,扮「小三」多次色誘黃宗澤,睇到啲觀眾嘩嘩聲。

 

講埋排名第4嘅劉溫馨,出道約4年以嚟,參演過嘅作品(連同未播嗰啲)逾30部,但幾乎未擔正過!係喺《愛‧回家》後期先有個配角「林希雅(Amy)」畀佢做吓,都咪話唔慘豬!好在,喺近年啲話題劇《不懂撒嬌的女人》同《踩過界》中,佢都有份演嘅,觀眾落啲眼力就搵到。參考《維基百科》,話劉溫馨喺未播映嘅大台劇《降魔的》中,會係「9大女主角之一」,唔知到時會分到幾多豬肉畀佢呢?

(蘋果日報)

留言