【兩頭住家和氣收場】Mandy冇嬲喎﹗

43歲嘅澳門賭業猛人周焯華(洗米華)一直享盡齊人福,身邊有正印陳慧玲(Heidi)同情人Mandy Lieu,本來洗米嫂對呢段三角關係眼不見為淨,直到洗米華喺香港同Mandy Lieu「世紀一拖」,最終令洗米嫂決定離婚!不過事後有指洗米華一直都唔肯動筆,努力挽救近一年嘅時間,洗米華冧掂老婆Heidi撤銷離婚申請,另一邊廂又出動銀彈政策o氹掂Mandy Lieu乖乖留英國,兩頭住家和氣收場。

 

點知喺上個月,洗米華去夏威夷參加老友澳門德晉集團百億CEO陳榮煉同台灣女星安以軒婚宴,玩到零警戒嘅洗米華,喺舞池同着住熱褲日本妹攬腰跳舞,動作火辣,事後新女被起底,原來係33B日模松岡李那,冇份去嘅Mandy就嬲嬲豬,仲有傳話佢越洋用WhatsApp鬧爆松岡。

 

事後有傳洗米華飛咗去英國o氹番Mandy Lieu,洗米華亦都多次被影到現身機場,不過今次有圖有真相,噚日《蘋果》讀者Jacky透過「爆相爆片」,喺英國時間23號嘅中午大約12點左右,喺Soho Theatre附近嘅唐人餐廳,見到佢哋兩個撐枱腳。讀者Jacky話:「我初初都唔為意,坐低冇耐先發現佢哋,洗米華好gentleman,好似普通情侶咁食飯,唔似因爲個日本明星仔嘈交,全程有講有笑!」佢仲話:「嗰間餐廳類型係價錢大眾化,乜嘢人都會有,我都估唔到會撞到佢哋,我坐咗15分鐘左右,佢哋就食飽走人!」

 

睇番相,洗米華同Mandy Lieu一樣係全黑嘅情侶裝扮,生咗2個小朋友嘅Mandy Lieu,目測身形都似乎冇乜點變,佢哋有傾有講,似乎冇乜嘢咁噃!

(蘋果日報)

留言