日模松岡李那早前在安以軒婚禮上俾周焯華(洗米華)攬腰跳辣舞,驚爆兩人已交往半年之消息。早前有周刊更爆出,身在英國專心湊B的Mandy Lieu為此大發雷霆,事關Mandy早已知洸米華與松岡之關係,要求洗米華與之疏遠,但男方拒絕。故Mandy與洗米華數月來一直陷冷戰。攬腰片瘋傳後,Mandy更WhatsApp鬧爆松岡。洗米嫂Heidi則懶理,帶女出走赴台。

 

洗米華在事件曝光後,先到倫敦安撫Mandy,再發聲明澄清指「有很多失實及純屬炒作之處」。而身在日本工作的松岡,昨日於ig上載唱Alicia Keys《If I Ain’t Got You》短片,歌詞內容指自己不是貪求財富之人,又指「有些人渴望鑽石戒指……但對我來說這都不算甚麼。」

 

今早松岡由經理人王友良陪同下由日本返港,大批傳媒凌晨五點幾已在等候。航班五時十分已降落,松岡約35分鐘後始步出,身穿深藍身連身裙,戴上口罩。早知有傳媒在場的松岡神情輕鬆,有備而來,王友良一直謂:「佢今日唔會答嘢㗎喇!佢今日唔會答嘢㗎喇!」但松岡就停低答喎。

 

問松岡依家係咪拍緊拖、係咪有男朋友呀?松岡就話:「依家係single。」

 

咁你同洗米華關係係點呢?是否仍有聯絡?松岡一聽到「周生」(即係洗米華),忽然就唔識聽廣東話,要王友良用英文繙譯。搞完一輪,松岡嘅答案係:NOT REALLY‧

 

松岡又稱去日本此行係為工作,又用英文謂:「估唔到俾周生攬一攬,會成為big news,真係意料之外。」

 

再問松岡有冇諗住拍拖呀?佢又聽唔明喇,要王友良繙譯,但最後都係冇答,由王友良代答話此行返港係影工作上嘅硬照咁喇。

 

當年Mandy為洗米華誕女後返港,洗米華派專車接送,而松岡就自己拖住大篋,由王友良陪同下坐機鐵返家。

(蘋果日報)

留言