未分類

【24吋纖腰變40吋巨肚】為咗B囡肥廿磅!

黃婉曼(Icy)仲有兩個月,就榮升人母,喜悅之情,喺同老公馮柏基買BB用品時刻流露。 Icy陀B女,轉變最大嘅,一定係身形,由以往嘅24吋腰,變到o依家嘅超級巨肚,肚圍已增至40吋,所以話,母愛真係好偉大。

如此轉變,Icy話係因為陀女後放肆大吃:「呢段時間最幸福,點食都得,我係幫BB食啫,所以變成一糰肉,我諗有少少超標,我重咗20幾磅,體重有成130磅呀。」

雖然係新手媽咪,但Icy已經打算產後餵人奶,仲有信心會好快上手學識湊女。問到Icy想分配乜嘢湊BB工作畀老公?佢話:「佢要返工,我怕半夜餵奶,爸爸冇覺好瞓,一個人辛苦就好,所以囡囡生活起居我搞掂,囡囡教育同學習,我就交畀老公,呢方面佢又叻啲。」Icy話同老公都唔會係怪獸家長,乜都順其自然,最緊要冇壓力。

至於BB英文名,Icy已經諗好,但佢只肯賣關子:「K字頭,我鍾意陽光同開心,囡囡英文名有呢個意思,叫乜嘢名?保持神秘。」BB每晚喺肚入面打拳踢腳,Icy相信囡囡將來都會活躍開心:「半夜成日喺我肚打晒拳,一餓就係咁踢,可能叫我畀嘢佢食,佢係為食妹、肥妹同活躍妹。」

為咗唔餓親B女,Icy一日食量原來好驚人:「我o依家唔餓得,一日至少食到8餐,少吃多餐,早餐可食三餐,飲吓雞汁、牛奶同花湯,又食吓麵包,下午茶食水果同餅乾,瞓前又有宵夜。記得啱啱有咗,最初最肚餓,好曳半夜想食快餐、杯麵或者雲吞麵,試過半夜老公車出去食消夜,後期識控制吓飲杯奶。」

 

Icy好享受囡囡留喺肚中嘅感覺,佢話:「我哋兩為一體,佢乜都陪住我,我訪問同工作時,囡囡踢得最犀利。有時工作遇上唔開心,好似感到囡囡陪住我,所以我希望佢將來都係一個堅強同硬淨嘅BB。」

(蘋果日報)

留言

發表迴響

你的電子郵件位址並不會被公開。 必要欄位標記為 *

Close

喜歡我們的文章嗎?按個讚吧!

關 閉 視 窗

(1261)